عفواً لو سمحت.. تمتع بفضولك!!

14 يونيو 2015
4725 عدد المشاهدات
شارك المحتوى واعرف مدى تاثيرك!
عفواً لو سمحت.. تمتع بفضولك!!

أول مدونة بكتبها بحياتي، اخترت إنها تكون غير شكل، فيها رح احكي عن أهم الخصال الموجودة في داخلي وهي الفضول وحب الاستطلاع.

من حبي للفضول اخترت إني احتضنه وبالمقابل الفضول احتضني.

 

احتضنت الفضول والفضول احتضني

كيف قدرت أغوص بفضولي؟

وبرأيي بحب إني أكون في حالة فضول وحب استطلاع، عشان أقدر أوصل لأكبر قدر ممكن من التعلم وبجوز الإلهام. كيف قدرت أغوص بفضولي؟ كل يوم في حياتي قضيته كان ولا زال فرصة للإستكشاف فيه، سواء شخص أو إشي أو فكرة أو معلومة أو كتاب وكأنه في شعلة في داخلي صعب جداً إنها تنطفي، بتغذيني وبتشحن مخزن أفكاري حتى أقدر أستمر في التفكير والإبتكار لأني دائماً بحب اسأل "كيف"؟ "متى"؟ و "ليش"؟ لو؟!! لانه دائماً السؤال على طرف لساني ودائماً أكيد الجواب موجود، وما سمحت لأي انسان يأثر علي بشكل سلبي وصار عندي إدمان على السؤال وليس فقط الجواب.

الشطارة مش بالجواب الشطارة بالسؤال

التجربة محور حياتي:

لما اكتشفت عادة حب الاستطلاع والفضولية في داخلي غذيتها لتستمر واستمر أكثر وأكثر بالاستمتاع بالحياة، لأني دائماً في حالة استكشاف حتى للأشخاص اللي ما بعرفهم بتبدأ رحلة التعرف على هذا الشخص، اهتماماته، كيفية تفكيره وطريقة اتخاذه للقرارات، ولما بزور مدينة جديدة بتتكون عندي رغبة في إني أعيش حياة أهل هالمدينة زي ما بيعيشوها اهلها، واخوض تجاربهم واعيش يوم بحياتهم، واتعرف عليهم وعلى طباعهم وسلوكهم وآرائهم، ودائماً بتكون تجربة مميزة مليانه بتجارب الحياة الممتعة ومن هيك تجارب بضيف لكتاب حياتي الفضولية أكتر وأكتر.

عزيزي الفضول مستحيل أتخلى عنك:

بساعدني فضولي دائماً على نجاحي المهني والعملي، في علاقاتي المهنية بقدر أتخيل كيف الناس بتفكر بقدر أتخيل مخاوف الناس اللي حولي ورغباتهم، وبالتالي بقدر أحدد طريقة التعامل معهم لتقدر كل الأطراف توصل لأهدافها. فضولك الطفولي لا تتخلى عنه، لأنه بخطوات بسيطة كتير بتقدر تغذيه ليصير أفضل وأجمل وامتع عاداتك.

 

خمس اشياء أكيد رح تستفيد منها أو تلهمك لإشي لتحافظ على شغفك:

1. العلم ما اله عمر ولا وقت محدد: خد قرار إنك دائماً تتعلم ولو إشي واحد جديد، من كتاب أو مقولة على الإنترنت أو من خلال حوارك مع شخص متميز وقدوة

2. كل يوم شخص جديد: مش غلط أبداً تتعرف دائماً على أشخاص جدد حاورهم اسألهم أسئلة لتتعرف على أفكارهم وخبراتهم

3. ابنة بطوطة في بلدك وخارج بلدك : حاول تظل دائم السفر حتى ولو لقرية مجاورة في نفس المدينة اللي بتعيش فيها، وجرب تخوض تجارب مع الناس اللي عايشين فيها، لا تتخلى عن فضولك!

4. افلام افلام افلام: حاول تعطي حالك وقت تتفرج على فلم حتى تغني تجربتك.

5. دائماً في مجال للسؤال: اذا حابب تنجح وتوصل لهدفك لا تتعب ولا تمل من السؤال والإستفسار، خليك لحوح لتقدر تأخذ الجواب اللي بتدور عليه لأي إشي بدك تفهمه أو تستوعبه.

عزيزي الفضول.. مستحيل أتخلى عنك

مــن الآخــر:

مختصر مفيد.. الحياة مملة بدون فضولية (حتى الحياة الزوجية) عشان هيك وسع خيالك ولا تتخلى عن فضولك، عشان ما تطفي شعلة الرغبة في المعرفة الموجودة جواتك، لانه ومن الآخر الفضول بهارات الحياة، وبدونه لا يوجد طعمة!

التعليقات

Ahmad Al Zoabe

الله يعطيك العافية جهودك مشكورة
بس اذا فية مجال حابب استفيد من خبرتك وقدرتك على تحليل الامور هل بالامكان ان توضح لي ما علاقة الفضول بالتطور المهني

سجل بنشرتنا

سجل بنشرتنا لتعرف شو في جديد